Baat Kar Lena- [Parle-moi]

English Translation available in film subtitles

Kabhi Mauka lage, Toh khayaal kar lena

Baat ho sake, Itni hi baat kar lena..

Mai tera kal hu, Iss par vichaar kar lena

Tumse khud ko maangu, Toh bawaal kar lena

Gar Jaayaz lage, Aankhein namm kar dena

Par Baat ho sake, Itni hi baat kar lena.

Shikhwe ho koi, Tum naraaz ho lena

Jo kuch kehna ho,  Bas keh dena

Duur chale jaaun tumse, Ishaara kar dena

Par Baat ho sake, Itni hi baat kar lena

Tumhe accha lage, Toh badnaam kar dena

Mohabbat meri, Neelaam kar dena

Baatein humaari, Sareaam kar dena

Par Baat ho sake, Itni hi baat kar lena

Jo sawaal kiye, Uske jawaab le lena

Gar mann na bhare, Saare Khwaab le lena

Tum aaina ho mera, Chaahe aazma lena

Par baat ho sake, Itni hi baat kar lena

Gar paas bulaana ho, Bas yaad kar lena

Gale lagaana ho, Toh saath kar lena

Jo tumhara na hua, Phirse Khayaal kar dena

Par Baat ho sake, Itni hi Baat kar lena.

Author- Gantavya Vivek Punj